Filmi vizatimor “Kau dhe ujku” do të restaurohet për brezat e rinj

Filmi i animuar “Kau dhe ujku” do të restaurohet në kuadër të nismës “Adopto një film për restaurim”, të Arkivit Qendror Shtetëror të Filmit.

Ky film vizatimor do të restaurohet me mbështetjen e zëvendësministres së Kulturës, Lira Pipa.

AQSHF synon të rikthejë në jetë veprat më të çmuara të kinematografisë shqiptare, duke ruajtur dhe promovuar trashëgiminë tonë audiovizive për brezat e sotëm dhe ata që do të vijnë.

“Kau dhe ujku”, një nga filmat e animuar më të dashur për publikun dhe pjesë e rëndësishme e kujtesës sonë kulturore, do t’i nënshtrohet procesit të restaurimit, për t’u ruajtur dhe përcjellë në cilësinë që meriton.

Kreu i AQSHF, Eljan Tanini falënderoi zëvendësministren Lira Pipa, për mbështetjen e kësaj nisme dhe kontributin e saj në mbrojtjen e trashëgimisë filmike shqiptare.

“Çdo film i restauruar është një pjesë e historisë sonë që rikthehet për të jetuar sërish”, thuhet në faqen online të AQSHF-së.

“Kau dhe ujku” është një përrallë e njohur shqiptare dhe një film vizatimor prodhim i Kinostudios “Shqipëria e Re”, në vitin 1980, ku regjisor dhe piktor ishte Tonin Vuksani, ndërsa skenari, i Luan Ramës.