FOKUS – Deklarata e Trump për bashkimin e Irlandës shkakton reagim të ashpër nga unionistët

LONDËR, 12 shtator /ATSH-DPA/- Presidenti amerikan Donald Trump ka shkaktuar reagime të forta në Irlandën e Veriut, pasi tha se do të dëshironte të shihte bashkimin e Irlandës, duke nënkuptuar që Irlanda e Veriut dhe Republika e Irlandës të bëhen pjesë e një shteti të vetëm.

Trump i bëri komentet gjatë një takimi me kryeministrin irlandez Micheál Martin.

I pyetur për mundësinë e një Irlande të bashkuar, ai tha se kjo “do të ndodhë” dhe se “mund të ndodhë që tani”.

Më vonë, ai e cilësoi bashkimin si një gjë “shumë interesante”.

Irlanda e Veriut aktualisht është pjesë e Britanisë së Madhe, ndërsa Republika e Irlandës është shtet i pavarur.

Deklarata e Trump u kundërshtua menjëherë nga partitë unioniste të Irlandës së Veriut, të cilat mbështesin vazhdimin e lidhjes me Britaninë e Madhe.

Lideri i Partisë Demokratike Unioniste (DUP), Gavin Robinson, tha se e ardhmja kushtetuese e Irlandës së Veriut, duhet të vendoset nga banorët e saj dhe jo nga Londra, Dublini apo Uashingtoni.

Ai deklaroi se beson se shumica do të vazhdojë të zgjedhë Britaninë e Madhe.

Edhe lideri i Partisë Unioniste të Ulsterit (UUP), Jon Burrows, tha se Trump ka të drejtë të shprehë mendimin e tij, por vendimin e merr populli i Irlandës së Veriut.

Sipas Marrëveshjes së Belfastit të vitit 1998 (Marrëveshja e së Premtes së Mirë), mund të zhvillohet një referendum për statusin e Irlandës së Veriut.

Nëse ka shenja se shumica mund të votojë për bashkimin me Irlandën, sekretari britanik për Irlandën e Veriut ka detyrimin të shqyrtojë thirrjen e referendumit.

Për ndryshimin kushtetues kërkohet gjithashtu vota pro e qytetarëve të Republikës së Irlandës.

Ndërkohë, disa politikanë pro bashkimit të Irlandës e pritën pozitivisht deklaratën e Trump.

Ish-lideri i Partisë Socialdemokrate dhe Laburiste (SDLP), Colum Eastwood, publikoi videon e deklaratës së Trump dhe shkroi: “Gjithmonë më ka pëlqyer.”

Në thelb, debati lidhet me një çështje shumë të ndjeshme, nëse Irlanda e Veriut duhet të mbetet pjesë e Britanisë së Madhe apo të bashkohet me Republikën e Irlandës.

Vendimi, sipas marrëveshjes së paqes, i takon popullit përmes procesit demokratik. /