FOKUS – Dronë, radarë dhe inteligjencë artificiale, NATO teston teknologjitë e reja në Evropë

WIESBADEN, 29 shtator /ATSH-DPA/- NATO dhe ushtria amerikane po synojnë të përmirësojnë bashkëpunimin ushtarak në Evropë, përmes një stërvitjeje të madhe që do të shtrihet nga veriu i Norvegjisë deri në Detin e Zi, njoftoi sot një zyrtar i ushtrisë gjermane.

Rreth 2 mijë ushtarë nga disa vende anëtare të NATO-s, pritet të marrin pjesë në stërvitjen vjetore “Avenger Triad 26”, e cila do të zhvillohet nga 6 deri më 15 tetor.

Gjenerali major, Bjorn Schulz i Forcave të Armatosura Gjermane, tha se kjo nuk do të jetë një stërvitje e zakonshme në terren.

Ushtritë do të përdorin kryesisht simulime kompjuterike dhe inteligjencë artificiale, për të provuar se si mund të bashkëpunojnë më shpejt dhe më mirë ushtritë e vendeve të ndryshme të NATO-s, në rast të një sulmi.

Teknologjitë e avancuara dhe komunikimi në kohë reale, përmes pajisjeve celulare do t’u mundësojnë forcave ushtarake të kenë informacion të përditësuar vazhdimisht, për atë që po ndodh në fushën e betejës.

Stërvitja është pjesë e Iniciativës për Parandalimin në Krahun Lindor (EFDI), e nisur rreth dy vjet më parë, për të përmirësuar bashkëpunimin dhe për të forcuar aftësitë ushtarake të vendeve të NATO-s, përgjatë krahut lindor të Aleancës, pranë zonave me rëndësi strategjike si kufiri me Rusinë.

Mësimet nga Ukraina

Major Ben Schiff i ushtrisë amerikane tha se ushtritë perëndimore, po nxjerrin mësime nga lufta në Ukrainë, e cila ka zhvilluar me shpejtësi përdorimin e dronëve ushtarakë, që nga fillimi i pushtimit në shkallë të gjerë nga Rusia.

Në kuadër të EFDI-së, dronët për zbulim, sensorët në tokë, radarët, kamerat dhe sistemet e armëve, mund të lidhen në një rrjet të vetëm.

Kjo do të thotë se këto pajisje dhe sisteme mund të shkëmbejnë informacion brenda pak sekondash.

Sipas Schiff, ky rrjet është i hapur për të gjitha vendet partnere të NATO-s. /