FOKUS – Estonia: Forcat speciale ruse po kryejnë akte sabotimi

TALIN, 28 shtator /ATSH – AA/ – Ministri estonez i Mbrojtjes, Martin Herem, ka folur për aktet e vazhdueshme të sabotimit nga Rusia dhe është zotuar për mbështetje të vazhdueshme për Ukrainën.

Duke theksuar mbështetjen e palëkundur të Estonisë dhe BE-së për Ukrainën, ai tha se “forcat speciale ruse po kryejnë akte sabotimi”.

“Sa i përket Estonisë, për momentin gjëja më e rëndësishme është të mbështesim Ukrainën, si BE, në mënyrë dypalëshe dhe duke përdorur asetet e ngrira”, tha Herem, duke shtuar se vendimi duhet të merret “pavarësisht faktit se ministri i Jashtëm rus na ka kërcënuar se do të na ndëshkojë për këtë”.

Deklaratat e ministrit estonez erdhën përpara takimit të ministrave të Mbrojtjes të BE-së në Bruksel.

Sot, ministrat e Mbrojtjes të BE-së u mblodhën për të diskutuar përgjigjen e bllokut ndaj sulmeve hibride, përfshirë një protokoll të propozuar emergjent që do të aktivizohej në përgjigje të çdo kërcënimi ndaj vendeve anëtare.

Takimi gjithashtu trajtoi gatishmërinë evropiane në fushën e mbrojtjes, mbështetjen për Ukrainën dhe situatën e sigurisë në Lindjen e Mesme.