FOKUS – Fake news ”vdes” Sam Altman

ROMË, 16 gusht /ATSH-ANSA/ – Fjalia ”Sam Altman ka vdekur”, shfaqet si informacion i rremë në Wikipedia në kërkimin në Google.

Sam Altman nuk vdiq më 12 gusht, ndryshe nga ajo që një rezultat kërkimi në Google mund ta kishte bërë dikë të besonte.

Kjo u zbulua në orët e fundit nga përdoruesit e rrjetit social X dhe forumit online Reddit, të cilët e raportuan.

Siç shpjegojnë disa botime të specializuara, përfshirë ”Business Insider”, ishte një gabim që nuk i atribuohet tërësisht motorit të kërkimit: përgjegjësia duket se bie mbi një faqe të Wikipedia-s kushtuar Altman, e cila ishte manipuluar, duke raportuar në mënyrë të rreme vdekjen e CEO-s së OpenAI në Seattle, kinse nga një atentat.

“Faleminderit që e raportuat, nuk shfaqet më dhe ky ishte një ndryshim jomanual nga ana e Google. Kur njerëzit vandalizojnë burimet e informacionit publik, kjo mund të ndikojë në informacionin që shfaqet në Kërkim”, thuhet në profilin e X ”Lajme nga Google”, i cili raporton informacion zyrtar dhe përditësime nga ”Big G” dhe ”Alphabet”.

Informacioni i rremë mbeti online në Wikipedia për afërsisht 41 minuta.

Kjo ishte kohë e mjaftueshme që Google të përditësonte rezultatet e kërkimit për të përfshirë datën e vdekjes së Sam Altman siç raportohet nga Wikipedia, përpara se ndryshimi të kthehej mbrapsht.

Episodi, i cili ngre disa reflektime mbi informacionin, saktësinë e burimeve të informacionit dhe inteligjencën artificiale, ironikisht përfshinte dy kompani të mëdha teknologjike./ a.jor.