FOKUS – Gjashtë vende të BE-së kërkojnë taksë mbi fitimet e kompanive të naftës

– Gjashtë vende të BE-së kërkojnë taksë mbi fitimet e jashtëzakonshme të kompanive të naftës, shkruan euronews com.

Duke iu referuar rritjes së fitimeve gjatë luftës në Lindjen e Mesme, gjashtë vende të BE-së, përfshirë Gjermaninë dhe Italinë, kërkojnë që ministrat e Financave të diskutojnë një taksë mbi fitimet e jashtëzakonshme në takimin e muajit të ardhshëm në Dublin.

Gjashtë vendet anëtare po shtojnë presionin për vendosjen e një takse në nivel të gjithë BE-së mbi fitimet e jashtëzakonshme të kompanive të naftës, ndërsa fitimet e tyre janë rritur ndjeshëm për shkak të luftës në Lindjen e Mesme, sipas një letre të siguruar nga Euronews.

Ministrat e Financave të Gjermanisë, Italisë, Austrisë, Polonisë dhe Portugalisë, së bashku me ministrin e Ekonomisë të Spanjës, i kanë dërguar një letër ministrit irlandez të Financave, pasi Irlanda mban presidencën e radhës të BE-së. Ministrat kërkuan që vendosja e kësaj takse të përfshihet në axhendën e takimit të ardhshëm të ministrave të Financave të BE-së në Dublin.

“Kompanitë e naftës po gëzojnë një përfitueshmëri të përgjithshme dhe marzhe nga produktet e rafinuara që tejkalojnë rritjen e çmimeve të naftës bruto,” thuhet në letër.

“Po përjetojmë një nga goditjet më të mëdha të ofertës në dekada dhe në mbarë botën po rritet pakënaqësia për shkak të rritjes së kostos së jetesës’, thekson deklarata.

Nënshkruesit kërkuan diskutime për një “kuadër në nivel të BE-së për taksimin e fitimeve të jashtëzakonshme”, duke i bërë thirrje bllokut të marrë në konsideratë mësimet e nxjerra nga taksa e përkohshme e vendosur në vitin 2022, pas pushtimit të Ukrainës nga Rusia.

Ministri gjerman i Financave, Lars Klingbeil, ka argumentuar vazhdimisht se kompanitë energjetike nuk duhet të përfitojnë në mënyrë të padrejtë nga konsumatorët gjatë krizës së tanishme.

Një burim nga ministria theksoi se “fitimet e tepërta të krijuara gjatë krizës duhet t’u rikthehen konsumatorëve’.

Disa prej vendeve që kanë nënshkruar letrën kishin kërkuar tashmë në fillim të këtij viti vendosjen e një takse mbi fitimet e kompanive të naftës.

Gjigantët e energjisë kanë regjistruar fitime të jashtëzakonshme që nga fillimi i operacioneve ushtarake amerikane dhe izraelite kundër Iranit në shkurt, të cilat kanë shkaktuar ndërprerje të mëdha të transportit detar përmes Ngushticës strategjike të Hormuzit.