FOKUS – Gjermania planifikon përdorimin e IA-së në operacionet ushtarake

– Gjermania po përgatit përdorimin e Inteligjencës Artificiale (IA) në operacionet ushtarake, me synimin për të përshpejtuar procesin e vendimmarrjes në fushën e operacioneve luftarake, sipas “Reuters”.

Ushtria gjermane po vlerëson rreth 30 sisteme dhe mjete të bazuara në Inteligjencën Artificiale, ndërsa synohet që një prej tyre të arrijë në fazën e prototipit gjatë vitit 2027.

Përdorimi i plotë i një sistemi të tillë parashikohet të nisë në vitin 2028.

Zëvendësadmirali Thomas Daum, drejtues i Komandës Kibernetike të ushtrisë gjermane, është shprehur optimist se një prototip mund të jetë gati në tremujorin e dytë të vitit 2027, duke i hapur rrugë zbatimit të plotë të teknologjisë nga viti 2028.

Lufta në Ukrainë ka nxjerrë në pah rëndësinë në rritje të përdorimit të dronëve dhe satelitëve në operacionet ushtarake.

Këto teknologji mundësojnë mbledhjen dhe transmetimin e sasive të mëdha të të dhënave nga terreni.

Në këtë kuadër, Inteligjenca Artificiale shihet si një mjet që mund të përpunojë dhe analizojë këto të dhëna, në një kohë shumë më të shkurtër sesa operatorët njerëzorë, duke ndihmuar në marrjen më të shpejtë të vendimeve.

Pjesa më e madhe e sistemeve që po shqyrtohen, janë zhvilluar nga kompani gjermane.

Në procesin e konkurrimit është përfshirë gjithashtu kompania franceze “ChapsVision”.

Ndërkohë, Gjermania ka vendosur për momentin të mos blejë Sistemin Smart Maven, një platformë e krijuar nga kompania amerikane “Palantir Technologies”.

Sistemi përdoret nga Shtetet e Bashkuara të Amerikës, NATO-ja dhe disa vende aleate për përpunimin dhe analizimin e të dhënave të mbledhura gjatë operacioneve ushtarake.

Rezervat e disa vendeve evropiane ndaj përdorimit të teknologjive të tilla amerikane, lidhen kryesisht me shqetësimet për krijimin e një varësie teknologjike nga Shtetet e Bashkuara të Amerikës, si dhe me çështjet që lidhen me sovranitetin dhe kontrollin mbi të dhënat. /