FOKUS – Izrael-Liban, marrëveshje për verifikimin e çarmatimit të Hezbollahu

– Libani dhe Izraeli kanë rënë dakord për një listë të shkurtër vendesh, që mund të dërgojnë trupa në Liban, për të verifikuar çarmatimin e Hezbollahut, bëri të ditur një zyrtar libanez, sipas “Reuters”.

Lista u hartua gjatë bisedimeve mes dy vendeve në ambasadën amerikane në Romë.

Shtetet e Bashkuara të Amerikës pritet të zgjedhin një ose më shumë vende nga kjo listë.

Emrat e vendeve nuk janë bërë publikë. Sipas burimeve të “Reuters”, Franca është kundërshtuar më herët nga Izraeli dhe SHBA-ja.

Çështja lidhet me marrëveshjen e 26 qershorit, e ndërmjetësuar nga SHBA-ja, e cila parashikon që tërheqja graduale e forcave izraelite nga Libani, të lidhet me çarmatimin e Hezbollahut, që do të verifikohet nga një palë e tretë.

Hezbollahu nuk është palë në marrëveshje dhe ka refuzuar të dorëzojë armët.

Libani ka kundërshtuar gjithashtu një propozim të mëparshëm, që verifikimi të kryhej nga kompani private sigurie.

Sipas zyrtarit libanez, rolin e verifikuesve do ta marrin vetëm shtete, ndërsa ende duhet të përcaktohet numri i trupave dhe mënyra se si do të bashkëpunojnë me ushtrinë libaneze.

Një mundësi është që trupat e huaja të vendosen nën kuadrin e misionit paqeruajtës të OKB-së në Liban, UNIFIL, por kjo do të kërkonte një rezolutë të re të Këshillit të Sigurimit të OKB-së.

Megjithatë, bisedimet nuk sollën një marrëveshje për zonën e radhës, nga e cila do të tërhiqen trupat izraelite.

Libani kishte propozuar qytetet Bint Jbeil dhe Khiam.

Raundi i ardhshëm i bisedimeve pritet të zhvillohet në fillim të shtatorit. /