FOKUS – Papa Leoni: IA duhet të jetë “shërbëtore e së mirës së përbashkët”, jo rivale e njerëzimit

VATIKAN, 21 gusht /ATSH -AA/ – Papa Leoni paralajmëroi të premten se Inteligjenca Artificiale (IA) nuk duhet të lejohet të zvogëlojë njerëzimin, ndërsa inkurajoi udhëheqësit politikë të sigurohen që inovacioni teknologjik t‘i shërbejë të mirës së përbashkët.

Duke iu drejtuar anëtarëve të Rrjetit Ndërkombëtar të Ligjvënësve Katolikë, Papa tha se zhvillimi i shpejtë i inteligjencës artificiale po ngre një nga pyetjet më përcaktuese morale të epokës moderne.

“Çdo arritje teknologjike e përball gjithashtu njerëzimin me një pyetje morale: jo vetëm çfarë mund të bëjmë, por çfarë duhet të bëjmë?” tha ai.

Kreu i Vatikanit tha se ligjvënësit kanë përgjegjësi të mos pengojnë inovacionin, por ta drejtojnë atë me mençuri, duke bërë thirrje për legjislacion që promovon progresin shkencor dhe teknologjik, duke mbrojtur të drejtat dhe liritë themelore.

Ai tha se politika të tilla duhet të mbrojnë përdoruesit nga shfrytëzimi, të ruajnë privatësinë, të sigurojnë transparencën dhe të forcojnë institucionet demokratike.

Papa paralajmëroi gjithashtu se zhvillimi i shpejtë i IA-së mund të krijojë forma të reja të varësisë teknologjike, veçanërisht për vendet më të varfra, dhe të rrezikojë të bëhet një mjet i “kolonializmit ideologjik ose ekonomik”.

Ai vuri në dukje shqetësimet mbi algoritmet që përcaktojnë “kush shihet” ose mbetet i padukshëm, si dhe platformat digjitale që formësojnë diskursin publik pa llogaridhënie.

“Bota nuk ka nevojë për një inteligjencë artificiale që zvogëlon njerëzimin”, tha Papa Leoni.

“Vetëm atëherë inteligjenca artificiale nuk do të bëhet rivale e njerëzimit, por shërbëtore e së mirës së përbashkët”, shtoi ai.