FOKUS – SHBA-ja dhe Izraeli do të prodhojnë raketa kruz në Gjermani

BERLIN, 9 shtator /ATSH-DPA/- Kompania amerikano-izraelite e mbrojtjes “Covenant” planifikon të hapë një fabrikë për prodhimin e raketave kruz, me rreze të gjatë veprimi në landin gjerman të Saksonisë, pranë Lajpcigut.

Sipas kompanisë, prodhimi i raketës “Anthem” për klientët evropianë pritet të nisë vitin e ardhshëm.

Fillimisht, synohet prodhimi i rreth 1,000 raketave në vit, ndërsa më pas kapaciteti do të rritet në 5,000 raketa në vit.

“Anthem” është projektuar për goditje të sakta në distanca të mëdha, thellë brenda territorit të kundërshtarit, dhe mund të mbajë një kokë luftarake prej më shumë se 200 kilogramësh.

Kompania nuk ka konfirmuar raportimet se raketa ka një rreze veprimi prej rreth 1,500 kilometrash.

Projekti vjen në një kohë kur, Gjermania dhe vendet e tjera evropiane po rrisin ndjeshëm prodhimin dhe rezervat e armatimeve, veçanërisht të armëve me rreze të gjatë, përballë kërcënimit të perceptuar nga Rusia.

“Covenant” synon që “Anthem” të jetë më e lirë se raketat e ngjashme, duke mundësuar prodhimin e tyre në sasi të mëdha. /