FOKUS – SHBA u kërkon vendeve evropiane të ulin tonet ndaj Rusisë

Kjo qasje e Uashingtonit vjen në një kohë kur administrata e presidentit Donald Trump ka rinisur përpjekjet për të arritur një zgjidhje të negociuar të luftës në Ukrainë, e cila ka hyrë në vitin e saj të pestë.

Nisma amerikane përfshin mundësinë e lehtësimit të sanksioneve ndaj Rusisë, ndërsa njëkohësisht ushtrohet presion ndaj Ukrainës për të ndalur sulmet ndaj infrastrukturës energjetike ruse.

Një nga zyrtarët që ka përcjellë mesazhet amerikane është Elbridge Colby, përgjegjësi i politikave të mbrojtjes në Pentagon dhe figurë kyçe në rishikimin e pranisë ushtarake amerikane në Evropë.

Sipas njërit prej burimeve, Colby i ka kërkuar një zyrtari baltik që të shmangen deklaratat provokuese ndaj Moskës.

Ai ka përmendur si shembull krahasimin e Rusisë me “një mi të futur në qoshe”.

Kjo shprehje lidhet me një deklaratë të kryeministrit estonez Kristen Michal në fund të shtatorit, kur ai iu referua presidentit Vladimir Putin në këtë mënyrë, duke argumentuar se Rusia po përdorte sabotazhin në Evropë për shkak të vështirësive në luftën kundër Ukrainës.

Një zyrtar tjetër evropian e përmblodhi mesazhin amerikan me fjalët; “Ne po ju ndihmojmë. Amerikanët janë aty. Thjesht mos bëni zhurmë”.

Mesazhet e Pentagonit pasqyrojnë një debat brenda NATO-s mbi mënyrën se si duhet të komunikohet kërcënimi rus.

Disa zyrtarë perëndimorë mendojnë se deklaratat e forta mund t’i shërbejnë Kremlinit, duke përhapur frikë dhe dobësuar mbështetjen për Ukrainën.

Të tjerë argumentojnë se qytetarët evropianë duhet të informohen hapur për rrezikun rus, në mënyrë që të kuptojnë nevojën për më shumë investime dhe sakrifica në fushën e mbrojtjes.

Shqetësimet janë shtuar edhe për shkak të dyshimeve mbi intensifikimin e operacioneve të sabotazhit rus në Evropë, pretendime që Moska i ka mohuar.

Zhvillimet vijnë ndërsa Uashingtoni po shqyrton edhe mundësinë e marrëveshjeve ekonomike me Rusinë dhe po rishikon praninë e trupave amerikane në Evropë, proces që mund të sjellë një reduktim të ndjeshëm të tyre.

Administrata Trump ka përsëritur se vendet evropiane të NATO-s duhet të marrin më shumë përgjegjësi për mbrojtjen e tyre, ndërsa SHBA-ja përqendrohet gjithnjë e më shumë te kërcënimet në Lindjen e Mesme, Amerikën Latine dhe Azinë Lindore.

Kjo situatë ka shkaktuar shqetësime në disa kryeqytete evropiane, të cilat kërkojnë të ruhet izolimi ekonomik i Rusisë dhe të mos dobësohet vigjilenca ndaj veprimeve të Moskës. /Ad.Ab./ a.jor.