FOKUS – Ukraina godet rafineritë ruse të naftës në një sulm të madh me dronë

MOSKË, 8 gusht /ATSH-DPA/- Rusia tha sot se Ukraina kishte ndërmarrë një sulm masiv me dronë, duke pretenduar se gjatë natës ishin kapur rreth 400 dronë, ndërsa më shumë se 80 të tjerë ishin zbuluar dhe rrëzuar deri në mesditë.

Pretendimet e Ministrisë ruse të Mbrojtjes nuk mund të verifikohen në mënyrë të pavarur, por shifrat e raportuara tregojnë për një sulm me përmasa të pazakonta.

Sipas kanaleve ruse dhe ukrainase në “Telegram”, një rafineri nafte në Syzran, në rajonin Samara të Rusisë, pranë lumit Vollga, është goditur.

Autoritetet rajonale konfirmuan se kishte rënë zjarr në një objekt industrial, por nuk dhanë detaje të tjera.

Rafineria e Syzranit, e ndodhur më shumë se 900 kilometra larg Ukrainës, është goditur dhe dëmtuar disa herë edhe në sulme të mëparshme ukrainase.

Raportohet se është goditur gjithashtu rafineria e naftës Ilsky, në rajonin jugor rus të Krasnodarit.

Ukraina ka goditur në mënyrë sistematike industrinë ruse të naftës me sulme me dronë me rreze të gjatë veprimi, në përpjekje për të ndërprerë furnizimin me karburant të ushtrisë ruse dhe për të ulur të ardhurat nga energjia, të cilat përbëjnë një burim të rëndësishëm financimi për Kremlinin. /