FOKUS – Von der Leyen nis turin ballkanik, vizita në Shqipëri, Kosovë, Malin e Zi dhe MV

BRUKSEL, 25 shtator/ATSH-ANSA/ – Presidentja e Komisionit Evropian, Ursula von der Leyen, do të zhvillojë javën e ardhshme një tur në Ballkanin Perëndimor, ku do të vizitojë Shqipërinë, Kosovën, Malin e Zi dhe Maqedoninë e Veriut.

Sipas zëdhënësit të Komisionit Evropian, Olof Gill, von der Leyen do të kryesojë fillimisht mbledhjen e Kolegjit të Komisionerëve të mërkurën, përpara se të nisë turin rajonal.

Ndalesa e parë do të jetë Tirana, ku presidentja e Komisionit Evropian do të takohet me presidentin e Republikës, Bajram Begaj, dhe kryeministrin Edi Rama.

Të enjten, von der Leyen do të vijojë vizitën në Prishtinë, ku pritet të takohet me ushtruesen e detyrës së presidentes, Albulena Haxhiu, dhe kryeministrin Albin Kurti.

Më pas, ajo do të udhëtojë drejt Podgoricës, ku do të zhvillojë takime me presidentin Jakov Milatoviç dhe kryeministrin Milojko Spajiç.

Turin në rajon, presidentja e Komisionit Evropian do ta përmbyllë në Shkup, me një vizitë në Maqedoninë e Veriut.

Vizitat në Bosnjë-Hercegovinë dhe Serbi janë shtyrë, ndërsa Komisioni Evropian ka bërë të ditur se vendimi lidhet me zgjedhjet e ardhshme në këto vende.

Në lidhje me Serbinë, raportime të tjera kanë ngritur edhe mundësinë që në vendimin për shtyrjen e vizitës të kenë ndikuar zhvillime të tjera politike dhe reagimet lidhur me aktivitete përkujtimore që nderojnë ish-komandantin serb të Bosnjës, Ratko Mladiç.

Turit të von der Leyen në Ballkanin Perëndimor pritet t’i kushtohet vëmendje e veçantë në kuadër të marrëdhënieve të Bashkimit Evropian me rajonin dhe procesit të integrimit evropian./ a.jor.