Milatoviq: Mali i Zi duhet t’i kufizojë rrjetet sociale për të miturit nën 16 vjeç

Presidenti i Malit të Zi, Jakov Milatoviq, deklaroi se vendi duhet të kufizojë rrjetet sociale për personat nën 16 vjeç dhe se ka ardhur koha për një debat serioz se si t’i mbrojë fëmijët në hapësirën dixhitale.

Deklarata u bë në Nju Jork, në margjinat e sesionit të 81-të të Asamblesë së Përgjithshme të Kombeve të Bashkuara, ku Milatoviq mori pjesë në një takim për mbrojtjen e fëmijëve në epokën e inteligjencës artificiale, njoftoi kabineti i tij.

Në takim morën pjesë presidentët e Francës, Spanjës dhe Kenias — Emmanuel Macron, Pedro Sánchez dhe William Ruto — si dhe kryeministri i Australisë, Anthony Albanese; u mblodhën krerë shtetesh e qeverish, përfaqësues të OKB-së, të shoqërisë civile dhe të sektorit privat, me fokus sigurinë, privatësinë dhe të drejtat e fëmijëve në kushtet e zhvillimit të shpejtë të IA-së.

“Fëmijëve duhet t’u kthehet e drejta për një fëmijëri të qetë dhe të shëndetshme… një fëmijëri e mbushur me lojë, shoqërim, natyrë dhe jetë reale, jo jetë e robëruar pas ekranit”, tha Milatoviq. Ai theksoi se fëmijët sot rriten në një hapësirë dixhitale që ndryshon shumë më shpejt se rregullat që duhet t’i mbrojnë.

“Mendoj se Mali i Zi duhet të marrë seriozisht në konsideratë kufizimin e qasjes në rrjetet sociale për të miturit nën 16 vjeç”, tha presidenti, duke shtuar se për këtë duhet biseduar me prindër, ekspertë, shkolla dhe të rinj, dhe duhen parë me kujdes përvojat e shteteve që po shkojnë në këtë drejtim. “Teknologjia duhet t’u hapë mundësi fëmijëve tanë, jo t’u rrezikojë sigurinë dhe zhvillimin. Përgjegjësia jonë është që rregullat t’i arrijnë ndryshimet që janë tashmë pjesë e jetës së tyre të përditshme.”

Sipas njoftimit, Spanja dhe Franca kanë njoftuar tashmë ndalimin e qasjes në rrjetet sociale për nën-16-vjeçarët, me sisteme të detyrueshme verifikimi të moshës, ndërsa edhe në nivelin e Bashkimit Evropian po zhvillohen rregulla të reja për mbrojtje më të fortë të fëmijëve në internet. Një nga temat qendrore të takimit ishte Koalicioni Global për të drejtat dhe mbrojtjen e fëmijëve në epokën e IA-së, i nisur në korrik, që sot mbledh 23 shtete dhe tetë agjenci të sistemit të OKB-së.

Burimi: Vijesti