Fraksion i dosjes “Revanshi”, GJKKO dënon 5 anëtarë të grupit kriminal me mbi 40 vite burg

Gjykata e Posaçme ka dhënë vendimin për një fraksion të dosjes “Revanshi”, duke shpallur fajtorë dhe dënuar pesë anëtarë të një grupi kriminal të hetuar nga SPAK.

Ish-efektivi i forcave speciale RENEA, Adrian Pikli, dhe Devis Bajramaj janë dënuar me nga 10 vite burg secili. Për shkak të gjykimit të shkurtuar, dënimi i tyre është reduktuar në 6 vite e 8 muaj burg.

Elvis Ndreca, djali i xhaxhait të ish-deputetit socialist Eduard Ndreca, dhe Edison Muçeku janë dënuar me nga 8 vite burg secili, dënim i cili u zbrit në 5 vite e 4 muaj për shkak të gjykimit të shkurtuar.

Ndërkohë, Armando Ndreca është dënuar me 11 vite burg, të reduktuara në 7 vite e 4 muaj me gjykim të shkurtuar.

Sipas akuzave të ngritura nga SPAK, anëtarët e grupit janë shpallur fajtorë për disa vepra penale, përfshirë kultivimin dhe trafikimin e lëndëve narkotike, armëmbajtjen pa leje, si dhe sigurimin e kushteve për kryerjen e vrasjeve.

Më 4 nëntor 2020, në Urën e Tapizës në Fushë-Krujë, Albert Zaja dhe persona të tjerë dyshohet se tentuan të vrisnin me armë zjarri shtetasit Durim Bami dhe Ervin Kodra.

Gjatë periudhës maj–korrik 2020, Albert Zaja dhe Edison Muçeku dyshohet se siguruan mjetet për vrasjen e Hamza Terziut.

Në korrik–gusht 2020, Elvis Ndreca dyshohet se siguroi mjetet për vrasjen e Durim Bamit.

Në tetor 2020, Armando Ndreca dyshohet se organizoi dhe financoi një grup që prodhoi dhe shiti 243 kilogramë kanabis në Lezhë.

Gjatë viteve 2020–2021, Deivis Bajramaj dhe Adrian Pikli dyshohet se u përfshinë në tregtinë e paligjshme të armëve dhe municioneve, duke i shitur edhe te persona me precedentë penalë.

Vendimi i GJKKO-së përbën një pjesë të dosjes “Revanshi”, ndërsa hetimet e SPAK për çështjen vijojnë.