FRANCË – Kaos në Luvër, protestuesit mbyllin muzeun e famshëm në Paris

PARIS, 19 tetor /ATSH-AFP/- Muzeu i famshëm i artit, Luvri, në Paris nuk u hap sot në mëngjes sipas orarit të zakonshëm, për shkak të protestës së studentëve, njoftoi muzeu në faqen e tij zyrtare dhe në rrjetet sociale.

Mediet franceze raportuan se studentët kishin bllokuar hyrjen në muze, në shenjë mbështetjeje për protestat e nxënësve, të cilat po zhvillohen prej disa javësh, si dhe për të kundërshtuar atë që ata e cilësojnë si dhunë të ushtruar nga policia.

Sipas raportimeve, sindikata franceze CGT, e cila nuk po merr pjesë drejtpërdrejt në këtë aksion, por e mbështet atë, deklaroi se muzeu duhet të qëndrojë i mbyllur të paktën deri në mesditë.

Nxënësit kanë protestuar që nga fundi i shtatorit, duke kërkuar kryesisht pajisje më të mira për shkollat, më shumë mësues dhe kushte më të mira për të mësuar.

Protesta në Luvër zhvillohet vetëm dy ditë pas një dite të madhe protestash, në mbarë Francën kundër rritjes së kostos së jetesës.

Demonstratat u shoqëruan me trazira dhe dëme të mëdha në shumë qytete të vendit.

E hëna shënon gjithashtu përvjetorin e një vjedhjeje spektakolare në Luvër, kur u grabitën bizhuteri të kurorës franceze, me vlerë prej 88 milionë eurosh. /