Georgievski godet ZNAM-in: Në Kumanovë nuk dëgjon këngë maqedonase, ndërsa ata bëjnë luftë për gjuhën në provimin e jurisprudencës

Ish-kryeministri i Maqedonisë së Veriut, Ljupço Georgievski, ka kritikuar ashpër partinë ZNAM, duke e akuzuar për mungesë idesh politike dhe për shndërrimin e çështjes së gjuhës në provimin e jurisprudencës në problem ndëretnik, siç njofton Telegrafi.

Në reagimin e publikuar në Facebook, Georgievski thotë se ZNAM-i prej muajsh, “si një pllakë gramafoni e prishur”, përsërit vetëm një temë: se do ta mbrojë deri në fund gjuhën maqedonase në provimin e jurisprudencës — ndërsa, sipas tij, në Kumanovë nuk ke mundësi të dëgjosh një këngë maqedonase.

Sipas Georgievskit, problemi qëndron në dy çështje themelore: mosveprimi i plotë politik i ZNAM-it dhe hapja e vetëdijshme e një çështjeje të vogël, duke e mbajtur atë si problem të madh multietnik.

Reagimi vjen në kohën kur çështja e përdorimit të gjuhës shqipe në provimin e jurisprudencës ka nxitur debate politike në vend: kryeministri Mickoski prezantoi sot modelin me dy pjesë (teoria në gjuhën e studimeve, praktika vetëm në maqedonisht), ndërsa Lidhja Shqiptare e kundërshtoi atë si devalvim të shqipes. Kryetari i ZNAM-it, Maksim Dimitrievski, është nga Kumanova.