Gimenez: Aventura ime te Milan nuk ka shkuar ashtu si duhej, por kam besimin e tifozëve

I intervistuar nga “Billboard Italia” disa ditë para Kupës së Botës, ku do të luajë me Meksikën, sulmuesi Santiago Gimenez foli për përvojën e tij të vështirë te Milan. Edhe pse u përfol për një largim të tij, ai qëndroi në Milanello.

“Mendoj se është fantastike të luash në ‘San Siro’, është një nga stadiumet më të rëndësishme në historinë e futbollit. Megjithatë, ajo që e bën vërtet të veçantë këtë aventurë është tifozeria e Milan”, tha Gimenez.

“Tifozët e Milan e mbështesin ekipin nga minuta e parë deri në minutën e nëntëdhjetë, para dhe pas ndeshjes. Që fëmijë kam qenë tifoz i Milan dhe të luaj në atë stadium që mund ta shihja vetëm në televizion do të thotë shumë për mua”, shtoi meksikani.

Më tej, Gimenez (7 gola në 37 ndeshje me fanellën kuqezi) shtoi: “Tifozët më pritën me shumë dashuri dhe, edhe pse nuk kam luajtur aq mirë sa do të doja, ata vazhdojnë të më shtyjnë dhe të kenë besim tek unë. Si një familje”.