GJELOSHAJ DËNON ASHPËR OFENDIMET E PDS-së NDAJ CAMAJT: FORUMI SHQIPTAR DO TË VENDOSË MBI PARIME EVROPIANE

_{Foto: Qeveria e Malit të Zi / Vlada Crne Gore}

Zëvendëskryeministri i Malit të Zi njëherësh lideri i Forumit Shqiptar, Nik Gjeloshaj, ka dënuar ashpër sulmet dhe ofendimet e Partisë Demokratike të Socialistëve të drejtuara ndaj Nënkryetarit të Kuvendit, Nikollë Camaj, dhe familjes së tij.

Reagimi i Gjeloshajt erdhi pasi PDS-ja sulmoi Camajn për shkak të qëndrimit të tij personal se nuk do ta nënshkruajë iniciativën e kësaj partie për shkarkimin e Kryetarit të Kuvendit të Malit të Zi, Andrija Mandiq.

Paraprakisht, PDS-ja doli me një komunikatë të ashpër ku akuzoi Camajn dhe deputetin Seid Haxhiq se “po zgjedhin pushtetin dhe dëgjueshmërinë ndaj Mandiqit përballë parimeve”, duke i cilësuar ata si “përdorues utilitarë” dhe duke pretenduar se me qëndrimin e tyre po i shërbejnë politikave që çuan në gjenocidin e Srebrenicës.

Gjeloshaj sqaroi se qëndrimi i Camajt është personal dhe se vendimi përfundimtar i Forumit Shqiptar do të merret në Kryesi, ndërsa theksoi se PDS-ja nuk ka asnjë të drejtë morale apo politike të ndërhyjë në punët e tyre të brendshme:

“Forumi Shqiptar vendos në mënyrë të pavarur. Ne nuk i jemi nënshtruar kurrë PDS-së dhe nuk do t’i nënshtrohemi askujt as nga shumica e tanishme. Madhërimi i kriminelëve të dënuar të luftës për ne është i papranueshëm, por ne nuk do të ulemi në nivelin e ofendimeve e as nuk do t’i përfshijmë familjet në përplasje politike,” u shpreh Gjeloshaj.

Në fund, lideri i Forumit Shqiptar i bëri thirrje PDS-së që të lërë mënjanë ofendimet dhe presionet, e të presë vendimin zyrtar të Kryesisë, i cili do të bazohet vetëm në parimet evropiane dhe euroatlantike.