GJERMANI – Merz sulmon ashpër Ben-Gvir për komentet e tij për vrasjet e synuara të palestinezëve

BERLIN, 19 gusht /ATSH-DPA/ – Kancelari gjerman, Friedrich Merz (CDU) kundërshtoi me forcë deklaratat e ministrit izraelit të Sigurisë Kombëtare, Itamar Ben-Gvir që bën thirrje për vrasje të synuara të palestinezëve në Rripin e Gazës, tha sot zëvendëszëdhënësi i qeverisë, Sebastian Hille.

Hille tha se kancelari dënoi me forcë thirrjet përçmuese dhe të paligjshme, duke i quajtur ato të papranueshme.

Zëdhënësi vuri në dukje një vendim të kohëve të fundit nga udhëheqësit e BE-së për të përgatitur masa të synuara kundër politikanëve radikalë që bëjnë thirrje për shkelje të dinjitetit njerëzor dhe të drejtës ndërkombëtare.

“Ministrat e jashtëm të BE-së do ta trajtojnë çështjen në një takim të ardhshëm”, tha Hille.

Duke folur gjatë një podcasti me Rom Braslavski, një ish-peng në Gaza, Ben-Gvir kishte thënë se “mendoj se vrasjet e synuara duhet të kryhen në Gaza, duke larguar 30, 40 persona çdo natë”.

Ai shtoi se nuk po i referohej vetëm palestinezëve militantë që përbënin një kërcënim të menjëhershëm./