Gjermania dërgon sistemin e mbrojtjes ajrore Patriot dhe ushtarë në Turqi

Forcat e armatosura gjermane do të vendosin njësinë e mbrojtjes kundërajrore dhe kundër raketave “Patriot” në Turqi si pjesë e misionit të NATO-s nga fundi i muajit të ardhshëm, njoftoi sot Ministria gjermane e Mbrojtjes, duke shtuar se misioni aktualisht është planifikuar deri në fund të shtatorit të këtij viti.

Sipas njoftimeve, Bundeswehr do të dërgojë një bateri të sistemit “Patriot” dhe rreth 150 ushtarë gjermanë në Turqi, të cilët do të zëvendësojnë njësinë amerikane të angazhuar në forcimin e aftësive të mbrojtjes ajrore të Turqisë, raportoi Reuters.

Ministri gjerman i Mbrojtjes, Boris Pistorius, tha se me këtë veprim, Berlini po merr përgjegjësi më të mëdha brenda NATO-s.

“Fakti që ushtarët tanë po punojnë shumë ngushtë me partnerët tanë turq dhe amerikanë tregon se sa i besueshëm funksionon bashkëpunimi me aleatët tanë”, tha Pistorius.

Duke vendosur sistemin “Patriot”, ushtria gjermane do të mbështesë mbrojtjen e hapësirës ajrore të Turqisë, e cila është anëtare e NATO-s dhe ka një pozicion të rëndësishëm strategjik në krahun juglindor të Aleancës.