Gjilas: po të fitojmë pushtetin, do t’i vendosim sanksione Putinit dhe oligarkëve rusë

Dragan Gjilas, i pari në listën zgjedhore “Evropska Srbija” (Serbia Evropiane), deklaroi mbrëmë në tubimin zgjedhor në Kraljevo se, siç njofton Danas, nëse lista e tij arrin të drejtojë shtetin, do t’u vendosë sanksione presidentit rus Vladimir Putin dhe oligarkëve rusë, duke u kujdesur që masat të mos godasin popullsinë e Serbisë, sepse, siç tha ai, serbët e dinë vetë se çfarë do të thotë të marrësh sanksione.

Gjilas premtoi gjithashtu se ditën e parë do ta shpërbëjë Agjencinë e Informacionit të Sigurisë (BIA) dhe do të formojë një agjenci të re. “Ata që kanë punuar profesionalisht do të qëndrojnë, rojet e Vuçiçit nuk do të kenë më punë”, u shpreh ai.

Ai tha se drejtimi i shtetit do të jetë i vështirë dhe se do të dalin edhe probleme për të cilat publiku nuk është i vetëdijshëm, por shtoi se ekipi i tij është i gatshëm t’i përballet kësaj sfide.

Deklaratat vijnë në kulmin e fushatës për zgjedhjet e parakohshme parlamentare të 25 tetorit, ku lista “Serbia Evropiane” garon kundër koalicionit të Vuçiçit dhe Listës Studentore.