Gonxhja: Strategjia e re e Kulturës synon ta kthejë Shqipërinë në një qendër rajonale

Ministri i Turizmit, Kulturës dhe Sportit, Blendi Gonxhja prezantoi Strategjinë Kombëtare të Kulturës 2026–2030, dokumentin që do të orientojë politikat publike për zhvillimin e sektorit kulturor gjatë pesë viteve të ardhshme.

Përmes një postimi në rrjetet sociale, Gonxhja bëri të ditur se strategjia është hartuar pas një procesi të gjerë konsultimi, ku kanë kontribuar mbi 100 profesionistë të fushës, janë zhvilluar 50 takime me ekspertë vendas dhe ndërkombëtarë, si dhe janë përpunuar rreth 600 pyetësorë në kuadër të konsultimit Delphi.

Sipas ministrit, dokumenti sjell një qasje të re për zhvillimin e artit, kulturës dhe trashëgimisë kulturore, duke parashikuar reforma ligjore dhe një sërë masash mbështetëse për sektorin.

Strategjia parashikon sipas Gonxhes vendosjen e statusit të artistit, rritjen e mbështetjes për krijuesit dhe skenën e pavarur, krijimin e një skeme kompensimi për bartësit e trashëgimisë kulturore jomateriale, si dhe përshpejtimin e procesit të digjitalizimit të muzeve, arkivave dhe shërbimeve kulturore.

Në të njëjtën kohë, dokumenti e konsideron kulturën si një faktor të rëndësishëm për zhvillimin ekonomik, social dhe turistik të vendit, me objektivin për të rritur investimet në këtë sektor në 1–1,2% të Prodhimit të Brendshëm Bruto deri në vitin 2030.

Sipas Gonxhes, zbatimi i Strategjisë Kombëtare të Kulturës 2026–2030 synon të konsolidojë Shqipërinë si një qendër të rëndësishme kulturore në Ballkanin Perëndimor dhe si një aktore aktive në hapësirën kulturore evropiane.