Granit Xhaka “on top” në Kupën e Botës, njihuni me mesfushorët më të mirë për pasimet nën presion

Faqja e njohur e statistikave sportive, “Gradient Sports”, ka publikuar klasifikimin e futbollistëve, të cilët kanë spikatur më së shumti në pasimet e realizuara nën presion gjatë fazës së grupeve të Kupës së Botës 2026.

Analiza, e bazuar në 36 ndeshjet e para të turneut, vendos në krye të renditjes mesfushorin dhe kapitenin e Zvicrës, Granit Xhakën, i cili ka grumbulluar 91.8 pikë.

Në vendin e dytë renditet mesfushori i Spanjës, Rodri, me 90.8 pikë. Lojtari i njohur spanjoll ka vazhduar të dëshmojë aftësitë e tij si dirigjent i mesfushës, duke luajtur rol kyç në kontrollin e ritmit të ndeshjeve të kombëtares së tij.

Vendi i tretë i takon mbrojtësit të Zvicrës, Manuel Akanji, i cili ka marrë 88.2 pikë. Futbollisti i Manchester Cityt është vlerësuar për sigurinë dhe saktësinë në ndërtimin e aksioneve nga prapavija.

Pesëshja e parë plotësohet nga Lee Kang-in i Koresë së Jugut, me 87.3 pikë, dhe mbrojtësi i Turqisë, Zeki Çelik, i cili ka grumbulluar 86.1 pikë.

Në mesin e lojtarëve më të vlerësuar figuron edhe mesfushori i Barcelonës dhe Spanjës, Pedri, i cili mban vendin e gjashtë me 84.9 pikë.

Kjo statistikë nuk fokusohet vetëm te përqindja e saktësisë së pasimeve, por analizon cilësinë e tyre në situata ku lojtarët ndodhen nën presion të drejtpërdrejtë nga kundërshtarët. Për këtë arsye, ajo konsiderohet një tregues i rëndësishëm i aftësisë së futbollistëve për të ruajtur kontrollin e lojës dhe për të marrë vendime të sakta në momente të vështira.

Paraqitjet e Granit Xhakës, Rodrit dhe Manuel Akanjit kanë qenë ndër elementët kryesorë,që kanë ndihmuar Zvicrën dhe Spanjën të shfaqin organizim të lartë gjatë fazës së grupeve, ndërsa renditja nxjerr në pah edhe një herë rëndësinë e lojtarëve që drejtojnë lojën nga mesfusha dhe mbrojtje.