GREQI – Erërat e forta rrisin rrezikun e zjarreve, anijet qëndrojnë në porte

ATHINË, 15 gusht /ATSH-DPA/ – Shërbimi zjarrfikës grek është në gatishmëri në pjesë të mëdha të Detit Egje për shkak të erërave të forta nga veriu që kanë përfshirë sot vendin, sipas parashikimit ditor të rrezikut nga zjarret të autoritetit grek të Mbrojtjes Civile.

Era sezonale “Meltemi” po fryn me shpejtësi rreth 70 kilometra në orë, ndërsa në disa zona shpejtësia e erës kalon 100 kilometra në orë.

Këto kushte mund të bëjnë që zjarret e vogla të përhapen me shpejtësi dhe të shndërrohen në zjarre të mëdha, të cilat do të jenë të vështira për t’u vënë nën kontroll për shkak të erërave të forta.

Erërat kanë shkaktuar gjithashtu probleme në transportin detar.

Shumë tragete janë detyruar të qëndrojnë të ankoruar në porte.

Nga porti i Pireut u nisën disa anije, por me vonesa, ndërsa anije të tjera në portet e Rafinas dhe Lavrios u urdhëruan të qëndrojnë në port për momentin.

Ndërprerjet e lundrimeve po ndodhin në kulmin e sezonit turistik në Greqi.

Anulimet dhe vonesat po prekin jo vetëm turistët e huaj, por edhe shumë pushues grekë.

Sipas parashikimeve, situata e motit pritet të vazhdojë deri në fillim të javës së ardhshme.

Autoritetet u kanë bërë thirrje qytetarëve dhe turistëve të tregohen veçanërisht të kujdesshëm për shkak të rrezikut të lartë të përhapjes së zjarreve dhe problemeve në lundrim.