Mario Draghi nderohet me çmimin “Marion Dönhoff”

Hamburg, 8 tetor /ATSH-DPA/- Mario Draghi, ish-president i Bankës Qendrore Evropiane (BQE) dhe ish-kryeministri i Italisë, do të nderohet këtë vit, me çmimin “Marion Dönhoff” për Mirëkuptimin dhe Pajtimin Ndërkombëtar.

Çmimi i jepet për kontributin e tij në bashkimin politik dhe ekonomik të Evropës, tha gazeta gjermane “Die Zeit”.

Një çmim i vecantë, do t’i jepet Qendrës “Elman” për Paqe dhe të Drejtat e Njeriut në Somali.

Qendra “Elman” për Paqe dhe të Drejtat e Njeriut nderohet për angazhimin e saj të veçantë në promovimin e paqes dhe pajtimit në Somali, një vend që është goditur rëndë nga luftërat dhe konfliktet.

Të dy çmimet kanë një vlerë prej 20 mijë eurosh secili dhe do të jepen më 6 dhjetor në teatrin “Deutsches Schauspielhaus” në Hamburg.

Juria tha se, gjatë drejtimit të Bankës Qendrore Evropiane, Draghi ndihmoi që zona e euros të kalonte pa u rrëzuar nga një krizë e rëndë financiare.

Kur ishte kryeministër i Italisë, ai arriti të mbante të bashkuar një vend të ndarë politikisht dhe qëndroi kundër rritjes së nacionalizmit dhe populizmit.

Pas largimit nga detyra, Draghi përgatiti një raport për të ardhmen e konkurrueshmërisë së Evropës.

Sipas jurisë, raporti paraqiste mënyra se si Bashkimi Evropian mund të përballet më mirë me konkurrencën e fuqive të mëdha botërore, veçanërisht SHBA-së dhe Kinës. /