Hamza për shtrëngimin e duarve me Kurtin: Kundërshtarë politikë jemi, populli s’duhet të polarizohet në armiqësi

Kryetari i Partisë Demokratike të Kosovës, Bedri Hamza, ka komentuar para gazetarëve shtrëngimin e duarve me kryeministrin Albin Kurti dhe kreun e AAK-së, Ramush Haradinaj, pas marrëveshjes së arritur mbrëmë vonë për Ligjin për Dhomat e Specializuara dhe emrin e presidentes së re, Justina Shiroka-Pula, siç njofton Klan Kosova.

Hamza tha se me liderët e partive të tjera ata janë kundërshtarë politikë, por nuk e sheh të pranueshme polarizimin e popullit deri në armiqësi.

“Unë mendoj që komunikimi duhet të ekzistojë. E kam thënë edhe dje, ne do të konkurrojmë me ide e programe, edhe me kritika të bazuara e konstruktive. Ne jemi kundërshtarë politikë, por jo me polarizu popullin, qytetarët e Kosovës deri në armiqësi”, tha Hamza.

Deklarata vjen një ditë pas seancës maratonë në Kuvend, ku me 81 vota u zgjodh presidentja e re dhe u miratuan ndryshimet në Ligjin për Specialen — zhvillime që i dhanë fund krizës politike në vend.