Haxhiu takohet me ambasadorin e BE-së, në fokus reformat dhe integrimi evropian

Kryetarja e Kuvendit të Kosovës, Albulena Haxhiu, ka pritur të mërkurën në takim ambasadorin e Bashkimit Evropian në Kosovë, Dirk Schuebel, i cili i dorëzoi Raportin e Komisionit Evropian për Kosovën, siç njofton RTK. Në takim u diskutua për Raportin, procesin e reformave dhe perspektivën evropiane të Kosovës.

Pas takimit, Haxhiu theksoi rëndësinë e angazhimit institucional për përshpejtimin e reformave dhe adresimin e ngecjeve të evidentuara në raportet evropiane. “Tani që Kuvendi i është kthyer punës, kemi mundësinë t’i japim një ritëm të ri reformave dhe të shënojmë përparim në fushat ku janë evidentuar ngecje”, ka shkruar ajo në Facebook.

Sipas raportimit të Zërit, një pjesë e rëndësishme e diskutimit iu kushtua Agjendës së Reformave, Planit të Rritjes dhe përmbushjes së detyrimeve brenda afateve të përcaktuara, si dhe shqyrtimit të aplikimit të Kosovës për anëtarësim në Bashkimin Evropian.

Haxhiu shprehu gatishmërinë për thellimin e bashkëpunimit ndërmjet Kuvendit dhe Zyrës së Bashkimit Evropian në Kosovë, veçanërisht në procesin legjislativ dhe në mbikëqyrjen e zbatimit të reformave. Ajo vlerësoi se rruga drejt Bashkimit Evropian kërkon punë të vazhdueshme, përkushtim dhe përgjegjësi të përbashkët nga të gjitha institucionet.