Siljanovska-Davkova në Bruksel: Maqedonia mbetet e përkushtuar ndaj rrugës evropiane, pavarësisht bllokadës

Presidentja Gordana Siljanovska-Davkova zhvilloi sot në Bruksel një takim pune me ambasadorët e vendeve anëtare të grupit “Miqtë e Ballkanit Perëndimor”, kushtuar bashkëpunimit rajonal dhe perspektivës evropiane të vendeve të rajonit, siç njofton Fokus.

Në takim morën pjesë ambasadorët e Kroacisë, Greqisë, Hungarisë, Italisë, Sllovakisë dhe Çekisë, të cilët presidentja i falënderoi për mbështetjen ndaj procesit eurointegrues të Maqedonisë së Veriut.

Ajo theksoi se, pavarësisht bllokadës së procesit të anëtarësimit, vendi mbetet i përkushtuar ndaj integrimeve evropiane. Si konfirmim, ajo përmendi përafrimin e legjislacionit maqedonas me të drejtën e BE-së, përputhshmërinë e plotë me Politikën e Përbashkët të Jashtme dhe të Sigurisë të BE-së dhe zbatimin e përshpejtuar të Agjendës së Reformave, të shënuar edhe në raportin e fundit të Komisionit Evropian.

Siljanovska-Davkova shprehu pritshmërinë që përshpejtimi i procesit të anëtarësimit të Maqedonisë së Veriut dhe integrimi i Ballkanit Perëndimor të jenë ndër prioritetet e presidencave të ardhshme të Këshillit të BE-së, veçanërisht gjatë presidencave të Greqisë dhe Italisë, si miq të Ballkanit Perëndimor.