Haxhiu u bën thirrje partive: Merruni vesh për presidentin, mos e çoni vendin në zgjedhje

Ushtruesja e detyrës së presidentes së Kosovës, Albulena Haxhiu, u bëri thirrje sot partive politike dhe deputetëve të Kuvendit që të merren vesh për zgjedhjen e presidentit, në mënyrë që vendi të mos shkojë sërish në zgjedhje për shkak të çështjes së kreut të shtetit, siç njofton Klan Kosova.

Duke folur në Kuvend, pas seancës së jashtëzakonshme ku u miratua në lexim të parë projektligji për Dhomat e Specializuara, Haxhiu theksoi se pas vendimit të 16 shtatorit të Gjykatës Speciale, gjetja e një zgjidhjeje për presidentin është çështje urgjente dhe e ndjeshme për institucionet e vendit.

“Ju inkurajoj për shkak pikërisht të urgjencës që e kemi, sensibilitetit, ndjeshmërisë, pas vendimit të 16 shtatorit është shumë e rëndësishme të jemi bashkë dhe t’ia japim vendin presidentit. Sepse ne mund ta votojmë ligjin, ata nëse ne shkojmë në zgjedhje mbesin vetëm”, ka deklaruar Haxhiu, sipas raportimit të Klan Kosova.

Ajo u bëri thirrje partive të takohen, të merren vesh dhe të kthehen në seancë për të votuar presidentin, duke theksuar se nuk ka çështje më të rëndësishme se zgjedhja e kreut të shtetit.

Thirrja vjen në ditën kur Kuvendi miratoi në lexim të parë ndryshimet në Ligjin për Dhomat e Specializuara, ndërkohë që afati kushtetues për zgjedhjen e presidentit përfundon më 6 tetor — dhe nëse kjo nuk ndodh, vendi rrezikon të shkojë në zgjedhje të parakohshme.