Hoxha në Kuvend: Shqipëria drejt anëtarësimit në BE brenda vitit 2030, progres i vlerësuar dhe konsoliduar

Ministri i Jashtëm, Ferit Hoxha, gjatë diskutimeve në Kuvend mbi projekt-rezolutën për integrimin e Shqipërisë në Bashkimin Europian, theksoi se miratimi i saj do t’i bënte nder vendit dhe institucioneve parlamentare.

Sipas Hoxhës, qëndrimi i Bashkimit Europian për zgjerimin nuk ka ndryshuar që nga miratimi i raportit të fundit dhe mbetet një prioritet strategjik.

“Mbështetja për zgjerimin e Ballkanit Perëndimor është e gjerë dhe e konsoliduar. Marrëdhëniet tona me BE dhe vendet anëtare nuk kanë qenë kurrë më të ngushta, më konkrete dhe më premtuese se sa sot”, deklaroi ai.

Ministri theksoi se procesi i negociatave për anëtarësimin është i bazuar në meritë dhe rezultatet konkrete të reformave janë kriteri kryesor i vlerësimit nga Bashkimi Europian.

“Progresi domethënës i bërë nga Shqipëria, me një ritëm të përshpejtuar, është vlerësuar dhe sot vendi ynë ka konsoliduar pozicionin si një nga dy vendet prioritare të programeve të zgjerimit së bashku me Malin e Zi”, shtoi Hoxha.

Ai u ndal edhe te objektivi i mbylljes së negociatave teknike deri në vitin 2027, duke theksuar se, nëse ruhet ritmi aktual, anëtarësimi i plotë brenda vitit 2030 është i arritshëm. Hoxha sqaroi gjithashtu se procesi kryesor aktual është shqyrtimi i raportit të Komisionit Europian për piketat e ndërmjetme dhe se ky proces nuk është bllokuar nga shtetet anëtare.

“Si çdo vend kandidat, Shqipëria nuk është pjesë formale e diskutimeve të brendshme në KE; ne do të jemi në atë tryezë vetëm kur të bëhemi anëtarë. Procesi i integrimit duhet të mbështetet në një klimë konstruktive dialogu dhe bashkëpunimi”, theksoi Hoxha.