Hoxha: Sistemi i ri për zbulimin e hershëm të zjarreve në deponi do të parandalojë përhapjen e tyre

Ministri i Mjedisit Jetësor dhe Planifikimit Hapësinor të Maqedonisë së Veriut, Muamet Hoxha, drejtori i Qendrës për Menaxhimin e Krizave (QMK), Muhamed Ali, dhe Vladimir Burevski në emër të kompanisë shkupjane “Modirum Platforms”, nënshkruan të shtunën një Memorandum bashkëpunimi për avancimin e zbulimit të hershëm të zjarreve në deponi dhe mbrojtjen e mjedisit.

Memorandumi vendos kuadrin për realizimin e një sistemi pilot për video-monitorimin e deponive përmes kamerave moderne, video-analitikës inteligjente dhe inteligjencës artificiale, i cili mundëson zbulimin në kohë reale të tymit, zjarrit dhe rreziqeve të tjera.

Qendra për Menaxhimin e Krizave do të sigurojë monitorim 24-orësh të sistemit dhe do të njoftojë menjëherë institucionet kompetente kur identifikohet rrezik, duke mundësuar reagim më të shpejtë dhe koordinim më të mirë. Nga ana tjetër, “Modirum Platforms” do t’i vërë pajisjet në dispozicion për përdorim të përkohshëm për një vit, si pjesë e kontributit të saj për iniciativa me interes publik.

Sipas ministrisë, me këtë projekt pilot avancohet përdorimi i teknologjive moderne digjitale në mbrojtjen e mjedisit, me fokus parandalimin, alarmin e hershëm dhe reagimin më efikas. Rezultatet e fazës pilot do të shërbejnë si bazë për shqyrtimin e mundësive të zgjerimit të sistemit në nivel kombëtar.

Burimi: Makfax