Huthët marrin kontrollin e Muhas në Jemen, pse qyteti është me rëndësi strategjike

Rebelët Huthi kanë marrë të enjten kontrollin e qytetit portual të Muhas në Jemen, sipas tre burimeve qeveritare jemenase që folën për Reuters.

Marrja e kontrollit të qytetit ka rëndësi strategjike, pasi Huthët, të mbështetur nga Irani, synojnë të shtrijnë kontrollin përgjatë zonave bregdetare të Detit të Kuq dhe të sigurojnë ndikim mbi Ngushticën Bab el-Mandeb.

Zhvillimi vjen në një kohë kur përplasjet mes koalicionit të udhëhequr nga Arabia Saudite dhe rebelëve Huthi janë përshkallëzuar, duke rritur shqetësimet se Jemeni mund të zhytet sërish në një konflikt të gjerë.

Armëpushimi i vitit 2022, i cili ndaloi pjesën më të madhe të luftimeve mes koalicionit që mbështeste qeverinë e njohur ndërkombëtarisht të Jemenit dhe Huthëve, duket se tashmë është dobësuar ndjeshëm.

Në qendër të shqetësimeve është Ngushtica Bab el-Mandeb, e njohur edhe si “Porta e Lotëve”, e cila lidh Detin e Kuq me Gjirin e Adenit dhe ndodhet mes Jemenit dhe brigjeve të Xhibutit e Eritresë. Ngushtica përbën një nga korridoret kryesore detare për transportin e energjisë dhe mallrave mes Gjirit, Detit të Kuq, Mesdheut dhe tregjeve aziatike.

Një bllokim i Bab el-Mandeb do të mund të rëndonte më tej tregjet globale të energjisë, veçanërisht duke pasur parasysh rëndësinë e rrugëve alternative pas kufizimeve në Ngushticën e Hormuzit.

Huthët kontrollojnë tashmë pjesën më të madhe të veriut të Jemenit dhe zonat më të populluara të vendit. Kontrolli i mëtejshëm i bregdetit të Detit të Kuq do t’u jepte atyre një pozicion edhe më strategjik në një konflikt që tashmë ka pasoja përtej kufijve të Jemenit.