Huthi-t pretendojnë goditjen e aeroportit King Khalid dhe bazës ajrore Khamis Mushait

Lëvizja Huthi e Jemenit pretendoi të hënën në mbrëmje se kishte goditur me një raketë balistike Aeroportin Ndërkombëtar King Khalid në Riad dhe me dronë bazën ajrore Khamis Mushait, pranë kufirit saudit me Jemenin, siç njofton Al Jazeera në përditësimet e saj live.

Pretendimi u bë nga zëdhënësi ushtarak i grupit, Yahya Saree. Arabia Saudite nuk e kishte konfirmuar këtë pretendim të fundit në momentin e publikimit të përditësimit, por më herët gjatë mbrëmjes koalicioni i udhëhequr nga Riadi kishte njoftuar se mbrojtja ajrore kishte interceptuar dhe shkatërruar raketa që po afroheshin drejt kryeqytetit, pas një paralajmërimi zyrtar për kërcënim armiqësor.

Khamis Mushait, në jugperëndim të mbretërisë, strehon një nga bazat ajrore më të rëndësishme saudite dhe është vënë në shënjestër edhe më parë gjatë kësaj vale sulmesh, ndërsa aeroporti i Riadit mbetet i mbyllur pas sulmit vdekjeprurës të së shtunës.

Huthi-t, aleatët jemenas të Iranit, kanë intensifikuar prej më shumë se një jave sulmet ndaj aeroporteve dhe objekteve të naftës në Arabinë Saudite, në përgjigje të ofensivës saudite dhe të forcave qeveritare jemenase përgjatë Detit të Kuq dhe ngushticës Bab al-Mandeb.