I akuzoi si të korruptuar, arbitrat spanjollë denoncojnë Florentino Pérez

Shoqata Spanjolle e Arbitrave të Futbollit (AESAF) ka paraqitur në Komitetin e Garës të RFEF një kërkesë për hapje dosjeje disiplinore ndaj Florentino Pérez, pas deklaratave të tij. Arsyeja janë deklaratat e 12 majit dhe 13 majit në “La Sexta”, ku ai akuzoi arbitrimin për “korrupsion sistemik, vjedhje titujsh dhe pasurim të paligjshëm”.

Më 12 maj, Perez tha: “Kam qenë këtu shumë sezone dhe kam fituar 7 Champions dhe 7 Liga, sepse të tjerat më janë vjedhur. Ka pasur korrupsion sistemik gjatë dy dekadave”. Ai shtoi se do të dorëzojë një “dosier prej 500 faqesh për UEFA-n” dhe e quajti “rastin më të madh të korrupsionit në historinë e futbollit”.

Në “La Sexta”, Perez deklaroi se “16 ose 18 pikë na janë vjedhur këtë sezon” dhe se “arbitrat pasurohen në mënyrë të padrejtë”. AESAF vlerëson se deklaratat tejkalojnë kritikën sportive dhe dëmtojnë dinjitetin e arbitrave, duke kërkuar masa urgjente, kompensim për dëmin moral dhe një kërkesë publike ndjese nga Real Madridi.