I dënuar me 3 vjet e 6 muaj burgim në Kosovë, arrestohet në Durrës 57-vjeçari

Një 57-vjeçar i shpallur në kërkim ndërkombëtar është lokalizuar dhe arrestuar provizorisht në Durrës, me qëllim ekstradimin drejt Kosovës, ku është dënuar me 3 vjet e 6 muaj burgim.

Arrestimi i shtetasit me inicialet E. Zh., lindur në Kosovë, u krye në lagjen nr. 13 të Durrësit, në kuadër të operacionit policor të koduar “Wanted 38”.

Specialistët e Seksionit për Mbështetjen Operacionale të Hetimit pranë Drejtorisë Vendore të Policisë Durrës e lokalizuan 57-vjeçarin pas informacioneve të siguruara në rrugë operative dhe veprimeve të shpejta për identifikimin e vendndodhjes së tij.

Sipas Policisë, E. Zh. ishte shpallur në kërkim pasi Gjykata e Prishtinës e kishte dënuar me 3 vjet e 6 muaj burgim për veprat penale “Falsifikimi i dokumenteve” dhe “Mashtrimi”, të parashikuara nga legjislacioni penal i Kosovës.

Pas arrestimit, Interpol Tirana, në bashkëpunim me autoritetet homologe të Kosovës, vijon procedurat për ekstradimin e tij.