I dërguari i Putinit Dmitriev zhvilloi bisedime “konstruktive” në Uashington, në tavolinë edhe iniciativa energjetike SHBA-Rusi pas luftës

Sipas zyrtarit amerikan, takimet e së hënës kishin për qëllim «vazhdimin e diskutimeve konstruktive për një zgjidhje paqësore të konfliktit Rusi-Ukrainë dhe iniciativat e mundshme energjetike SHBA-Rusi pas përfundimit të luftës», siç njofton Reuters.

Dmitriev, i cili drejton fondin sovran rus RDIF dhe vepron si i dërguar i Kremlinit për marrëdhëniet ekonomike me SHBA-në, zhvilloi diskutime me zyrtarë të lartë amerikanë në kryeqytetin amerikan një ditë para se lajmi të bëhej publik të martën.

Vizita e tij në Uashington vjen pak ditë pas takimit mes presidentit amerikan Donald Trump dhe presidentit ukrainas Volodymyr Zelensky javën e kaluar në Nju Jork, ku sipas raportimeve u diskutua edhe mundësia e një armëpushimi që do të përfshinte objektivat energjetike.

Në fillim të këtij muaji, të dërguarit e presidentit Trump, Steve Witkoff dhe Jared Kushner, u takuan me presidentin Putin në Moskë, çka e vendos takimin e Dmitriev-it në kuadrin e një zinxhiri të ri kontaktesh diplomatike që synojnë mbylljen e konfliktit të nisur në vitin 2022.

Ndryshe nga takimi i javës së kaluar në Nju Jork, ku Dmitriev u takua me të dërguarit amerikanë në kuadër të Asamblesë së Përgjithshme të OKB-së, vizita e së hënës në Uashington përfaqëson një hap tjetër të drejtpërdrejtë në dialogun mes palëve për skenarin post-luftë, përfshirë edhe bashkëpunimin e mundshëm energjetik.