I dërguari papal, kardinali Matteo Zuppi, do të vizitojë Rusinë në fund të shtatorit

Kardinali italian Matteo Zuppi, i dërguari i posaçëm i Vatikanit për misionin paqësor në Ukrainë, planifikon të vizitojë Rusinë në fund të shtatorit, konfirmoi vetë ai të hënën.

Lajmin e bëri të ditur agjencia shtetërore ruse e lajmeve RIA, e cila citon deklaratën e kardinalit. Zuppi është kryetar i Konferencës së Ipeshkëve italianë dhe ushtron prej vitit 2023 mandatin e dhënë nga Papa Françesku si i dërguari i Vatikanit për paqen në Ukrainë.

Më herët, këshilltari për politikën e jashtme i presidentit rus Vladimir Putin, Yuri Ushakov, ishte cituar nga mediat shtetërore se do të diskutonte me Zuppi-n çështje humanitare që lidhen me konfliktin në Ukrainë.

Vizita e fundit e kardinalit në Moskë u zhvillua në tetor 2024. Atëherë ai diskutoi për ribashkimin e familjeve të ndara nga lufta, për shkëmbimin e robërve të luftës dhe për perspektivat e dialogut për t’i dhënë fund luftës në Ukrainë.

Misioni i Zuppi-t ka në fokus kryesisht çështjet humanitare që burojnë nga konflikti, përfshirë fatin e civilëve, fëmijëve dhe të robërve, dhe përfaqëson përpjekjet e vazhdueshme të diplomacisë vatikane për t’i gjetur zgjidhje krizës ukrainase.

Burimi: Reuters