I hodhën në erë makinën me tritol, policia merr në mbrojtje avokatin Idajet Beqiri dhe familjen e tij
Avokati Idajet Beqiri dhe familja e tij janë marrë në mbrojtje nga Policia e Shtetit, pas shpërthimit me eksploziv të makinës së tij të premten në lagjen “Myslym Shyri” në Tiranë.
Avokati i njohur Idajet Beqiri dhe familja e tij janë marrë në mbrojtje nga Policia e Shtetit, pas shpërthimit me eksploziv të makinës së tij në lagjen “Myslym Shyri”, në Tiranë, siç njofton Shqiptarja.com.
Ndaj Beqirit ka nisur një procedurë verifikimi për ta përfshirë në programin e mbrojtjes së veçantë për personat e rrezikuar nga veprimtari kriminale, i njohur si programi “Siguria”, i cili përfshin patrullimin e vazhdueshëm të banesës, shoqërimin nga policia gjatë lëvizjeve dhe ruajtjen e tij. Vetë avokati i kishte dërguar kërkesë Platformës së Bashkëqeverisjes, ku kishte adresuar shqetësimin për marrjen e shërbimit të mbrojtjes nga Ministria e Brendshme dhe Policia e Shtetit.
Ngjarja ndodhi të premten, kur autorë ende të paidentifikuar vendosën eksploziv në makinën e avokatit, tip “Range Rover”, dhe e hodhën në erë; makina u dëmtua plotësisht nga shpërthimi. Beqiri dhe bashkëshortja e tij ndodheshin në Bruksel kur ndodhi ngjarja, ndërsa ajo u raportua nga i biri i tyre, i cili mësohet se ka qenë në banesë në momentin e shpërthimit.
Beqiri ka deklaruar në intervista se i njeh të gjithë autorët e këtij atentati, por ende nuk i ka bërë publikë emrat e tyre, dhe se nuk bëhet fjalë për një ngjarje kriminale të zakonshme. Ngjarja po hetohet nga policia, e cila ka sekuestruar pamjet e kamerave të sigurisë së zonës dhe po heton mbi pistën e hakmarrjes.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.