IEA: Kriza e Hormuzit është kërcënimi më i madh në histori për sigurinë energjetike, flukset mund të bien nën 2 milionë fuçi në ditë deri në 2035
Agjencia Ndërkombëtare e Energjisë paralajmëron në raportin e saj vjetor World Energy Outlook se kriza e Ngushticës së Hormuzit ka krijuar kërcënimin më të madh në histori për sigurinë energjetike dhe se bota e energjisë nuk ka asnjë rrugë të besueshme kthimi në gjendjen e para luftës.
Agjencia Ndërkombëtare e Energjisë (IEA) paralajmëroi të enjten se kriza në Lindjen e Mesme, e nisur në shkurt nga bombardimet amerikane dhe izraelite ndaj Iranit, ka krijuar kërcënimin më të madh për sigurinë energjetike në histori, siç njofton AFP. Në raportin e saj kryesor vjetor, World Energy Outlook, agjencia thotë se konsumatorët po e mbajnë gjithnjë e më shumë barrën, ndërsa bota po i shteron mënyrat për ta përthithur goditjen e konfliktit mbi furnizimet me energji.
“Kriza e Ngushticës së Hormuzit ka krijuar kërcënimin më të madh për sigurinë energjetike në histori, një kërcënim që e eklipson shkallën e goditjeve të naftës të viteve 1970”, shkroi drejtori ekzekutiv i IEA-së, Fatih Birol, në parathënien e raportit. Sipas tij, qeveritë kanë ndërhyrë për t’i mbrojtur familjet, por konsumatorët janë përballur gjithsesi me çmime më të larta dhe, në disa raste, me mungesa furnizimi.
Sipas raportimit të Dow Jones, para konfliktit rreth 20 milionë fuçi naftë në ditë kalonin përmes Hormuzit, por kjo sasi mund të bjerë në 8,5 milionë fuçi në ditë deri në vitin 2030 dhe në më pak se 2 milionë deri në vitin 2035, nëse ngushtica mbetet rëndë e ndërprerë. “Kriza e Hormuzit i ka dhënë sistemit një goditje të madhe. Nuk shoh asnjë rrugë të besueshme që bota e energjisë të kthehet siç ishte më parë”, tha Birol.
Prodhuesit e Gjirit po garojnë për rrugë alternative: Arabia Saudite përdor tubacionin Lindje-Perëndim drejt Detit të Kuq, ndërsa Emiratet e Bashkuara Arabe përdorin tubacionin drejt portit të Fujairah-ut. Sipas IEA-së, rreth 7 milionë fuçi në ditë kapacitet i ri tubacionesh janë në ndërtim ose në shqyrtim, me një investim të vlerësuar prej 40 miliardë dollarësh, që do t’i shtonte rreth 2 dollarë kostos së çdo fuçie nafte të Lindjes së Mesme. “Nuk është e lehtë, por bota e energjisë mund të ia dalë pa ngushticën. Nuk mund t’ia dalë pa Lindjen e Mesme”, tha Birol.
Raporti vë në dukje se çmimi i naftës Brent u luhat nga rreth 71 dollarë fuçia para luftës në mbi 126 dollarë, përpara se të binte drejt 93 dollarëve në nëntor. IEA-ja pret tani që tregu global i naftës të kthehet në tepricë, nga 1,7 milionë fuçi në ditë këtë tremujor në rreth 3,8 milionë vitin e ardhshëm, ndërsa kërkesa globale ra me rreth 3,7 milionë fuçi në ditë nga marsi në tetor krahasuar me një vit më parë — me rënie prej 10 për qind në Lindjen e Mesme dhe 5 për qind në Azi. “Sa më gjatë zgjat kriza, aq më të thella do të jenë efektet”, paralajmëroi Birol.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.