Institucionet paralajmërojnë qytetarët: Kujdes nga SMS dhe email-et mashtruese që imitojnë bankat dhe Postën Shqiptare

Autoriteti Kombëtar për Sigurinë Kibernetike (AKSK) ka bërë thirrje për kujdes të shtuar ndaj mesazheve mashtruese që qarkullojnë përmes SMS-ve dhe email-eve, të cilat përdorin emrin dhe identitetin vizual të bankave, Postës Shqiptare apo institucioneve të tjera me qëllim marrjen e të dhënave personale dhe bankare.

Sipas AKSK-së, këto komunikime shpesh krijojnë një ndjesi urgjence duke pretenduar se qytetarët duhet të kryejnë veprime të menjëhershme, si pagesa për një pako, konfirmimi i adresës, zhbllokimi i një llogarie bankare apo shmangia e pezullimit të një shërbimi.

Autoriteti këshillon qytetarët që:

të mos klikojnë në linqe të dyshimta të dërguara përmes SMS-ve apo email-eve;

të mos ndajnë fjalëkalime, kode verifikimi (OTP), PIN-e apo të dhëna të kartave bankare;

të verifikojnë çdo njoftim vetëm përmes faqeve dhe kanaleve zyrtare të bankave apo institucioneve përkatëse;

të raportojnë çdo rast të dyshimtë pranë AKSK-së dhe institucionit që dyshohet se po imitohet.

“Një klikim i nxituar mund të mjaftojë për të komprometuar të dhënat tuaja”, paralajmëron AKSK, duke u bërë thirrje qytetarëve të tregojnë vigjilencë dhe të kontrollojnë gjithmonë burimin e një mesazhi përpara se të ndërmarrin ndonjë veprim.