IRAN – Ghalibaf: Rihapja e Hormuzit varet nga përmbushja e kushteve nga SHBA

TEHERAN, 20 shtator /ATSH-DPA/ – Kryetari i parlamentit të Iranit dhe kryenegociatori në bisedimet me Shtetet e Bashkuara, Mohammad Bagher Ghalibaf, ka deklaruar se Ngushtica e Hormuzit mund të rihapet vetëm nëse Uashingtoni përmbush fillimisht të gjitha kushtet e Teheranit, sipas një raporti të agjencisë shtetërore të lajmeve IRNA, të publikuar sot.

”Nëse kjo nuk ndodh, nuk do të ketë kthim në gjendjen e mëparshme të negociatave”, tha Ghalibaf, duke shtuar se qëndrimet e Iranit janë të qarta dhe të panegociueshme.

Të shtunën, kreu i Këshillit të Lartë të Sigurisë Kombëtare të Iranit, Mohsen Rezaee, kishte sinjalizuar gatishmërinë e Iranit për t’i dhënë fund luftës me SHBA-në, bazuar në marrëveshjen kuadër që të dy vendet arritën në qershor.

Rezaee renditi shtatë kushte për këtë në një intervistë me transmetuesin në gjuhën arabe, ”Al Jazeera”.

Ndër të tjera, Teherani kërkon që SHBA-ja të zhbllokojë asetet e ngrira, t’i japë fund luftës në të gjitha frontet dhe të heqë bllokadën ndaj porteve dhe anijeve iraniane. Udhëheqja iraniane kërkon gjithashtu që Uashingtoni të mos ndërhyjë në punët e brendshme të vendit.

Këto pika janë në përputhje me marrëveshjen e qershorit, e cila synonte të hapte rrugën për një marrëveshje përfundimtare.

Rezaee kërkoi gjithashtu që SHBA-ja t’i përmbushë të gjitha kushtet përpara se të mund të vijonin negociata të mëtejshme. Këto bisedime pritet gjithashtu të trajtojnë të ardhmen e programit bërthamor të Iranit./ a.jor.