Të shtëna ndaj një automjeti në lëvizje në rrugën Debresh–Vrapçisht, policia gjen predhë dhe dëmtime në BMW

Një incident me armë zjarri është raportuar mbrëmjen e së enjtes në rrugën lokale mes fshatrave Debresh dhe Vrapçisht të Gostivarit, pasi në një automjet në lëvizje është vënë re një predhë arme zjarri dhe dëmtime. Siç njofton Makfax, duke iu referuar Ministrisë së Punëve të Brendshme, rasti është denoncuar në Departamentin e Policisë në Gallatë.

Sipas njoftimit të Sektorit të Punëve të Brendshme të Tetovës, më 6 nëntor rreth orës 22:40, E.J. (28) nga Gostivari ka raportuar veprën penale “shkaktim i rrezikut të përgjithshëm”. Sipas raportimit, ndërsa E.Z. (31), po ashtu nga Gostivari, drejtonte një automjet “BMW” me targa të Gostivarit në rrugën lokale nga fshati Debresh drejt Vrapçishtit, ata kanë dëgjuar një goditje të fortë në pjesën e pasme të çatisë së automjetit.

Pasi kanë ndaluar dhe kanë dalë nga automjeti, dy gostivarasit kanë vënë re predhën e armës së zjarri dhe dëmtime në kapakun e motorit të automjetit. Në njoftimin e policisë nuk raportohet për persona të lënduar.

Policia ka kryer këqyrje në vendin e ngjarjes dhe, siç njofton MPB-ja, po ndërmerren masa për zbardhjen e plotë të rastit dhe për identifikimin e autorit të të shtënave.