IRAN – Pezeshkian: Rikthimi te lufta nuk i shërben askujt

TEHERAN, 3 nëntor /ATSH-AFP/ -Presidenti iranian, Masoud Pezeshkian, deklaroi sot se një rikthim në luftë nuk do t’i sillte përfitime askujt, disa orë pas raportimeve për sulme amerikane ndaj ishullit Qeshm, në Ngushticën e Hormuzit.

Deklarata vjen në një moment tensionesh të larta mes Teheranit dhe Uashingtonit.

Kryenegociatori iranian, Mohammad Bagher Ghalibaf, paralajmëroi se Republika Islamike ishte “gati për betejë, me gishtin në këmbëz”, ndërsa zëvendësministri i Jashtëm, Kazem Gharibabadi, theksoi se Irani ruante të drejtën e vetëmbrojtjes legjitime.

Megjithatë, Pezeshkian tha se qeveria e tij po përpiqej ta zgjidhte krizën përmes dialogut dhe se udhëheqësi suprem i kishte dhënë kompetenca të reja për të negociuar edhe çështje që më parë konsideroheshin të panegociueshme.

Sipas raportimeve të mediave amerikane “The Wall Street Journal”, CNN dhe “The New York Times”, sulmet amerikane kishin goditur ishullin Qeshm, një pikë strategjike në Ngushticën e Hormuzit.

Zyrtarë amerikanë, të cituar nga këto media, i përshkruan sulmet si mbrojtëse.

Agjencia shtetërore iraniane IRNA raportoi për pesë shpërthime të njëpasnjëshme në ishull, ndërsa disa banorë pretenduan se kishin parë dy avionë në qiell.

Nga ana tjetër, presidenti amerikan Donald Trump deklaroi në platformën Truth Social se Irani dëshironte një marrëveshje sa më shpejt dhe se një zgjidhje diplomatike ishte e mundur.

Katari, i cili ndërmjetëson negociatat indirekte mes dy vendeve, konfirmoi se të dyja palët mbeteshin të angazhuara në procesin diplomatik dhe po shqyrtonin propozimet e paraqitura. /Ad.Ab./ a.jor.