Irani: Nëse SHBA-të vazhdojnë bllokadën, Hormuzi nuk do jetë një rrugë e sigurtë

Zëdhënësi i Ministrisë së Jashtme të Iranit, Esmaeil Bekayi, ka deklaruar se Teherani aktualisht nuk po zhvillon negociata të drejtpërdrejta me Shtetet e Bashkuara, por po shkëmben mesazhe përmes vendeve ndërmjetëse.

Duke folur për bisedimet me Omanin lidhur me Ngushticën e Hormuzit, Bekayi tha se përparimi i negociatave me Muskatin mund të ndikojë edhe në mundësinë e zhvillimit të bisedimeve me Uashingtonin.

Sipas tij, negociatat me Omanin po zhvillohen në mënyrë “konstruktive dhe pozitive”, ndërsa çështja e vendosjes së tarifave për anijet që kalojnë përmes Ngushticës së Hormuzit nuk është aktualisht pjesë e diskutimeve.

Bekayi paralajmëroi se nëse SHBA-ja vazhdon politikën aktuale dhe bllokadën detare, Ngushtica e Hormuzit nuk do të konsiderohet një rrugë e sigurt për lundrim.

Zëdhënësi iranian theksoi gjithashtu se diplomacia e vetme nuk mjafton për heqjen e bllokadës detare dhe ndalimin e sulmeve amerikane, duke shtuar se Teherani po përdor edhe “opsione ushtarake”.

Duke iu referuar zhvillimeve në zonat Minab, Lamerd dhe Hormuz, Bekayi akuzoi SHBA-në dhe Izraelin për kryerjen e krimeve të luftës dhe tha se çështjet përkatëse u janë përcjellë institucioneve ndërkombëtare.

Ndërkohë, Bekayi bëri të ditur se Pakistani ka ftuar kryetarin e Parlamentit iranian, Mohammad Bagher Qalibaf, dhe ministrin e Jashtëm, Abbas Araghchi, për një vizitë, e cila sipas tij do të zhvillohet në kohën e përshtatshme.