“Iso mbi Kalldrëm”, netët e gushtit me tingujt e traditës në qytetin e Gjirokastrës

Gushti në Gjirokastër erdhi me një tjetër arsye për të shëtitur në pazarin karakteristik të qytetit.

Kryetari i bashkisë së Gjirokastrës, Flamur Golemi, përcolli pamje nga rrugët e gjallëruara të pazarit, ku çdo mbrëmje, prej 1 deri më 29 gusht, tingujt e isopolifonisë shqiptare do të mbushin kalldrëmet e qytetit, duke sjellë emocione, traditë dhe atmosferën unike të trashëgimisë sonë shpirtërore.

Aktiviteti i përditshëm që do të argëtojë vendas e turistë titullohet “Iso mbi kalldrëm”, dhe të parët që performuan ishin të rinjtë e grupit “Nektari i Polifonisë”.

“Grupet popullore nga treva të ndryshme do t’i japin jetë mbrëmjeve verore, në një përjetim autentik ku historia, muzika dhe mikpritja gjirokastrite bëhen një”, u shpreh kryebashkiaku Golemi, me ftesën për ta përjetuar së bashku Gjirokastrën përmes zërit të isos.

Ndërkohë, bashkia ka marrë masa edhe për aktivitete të tjera duke u paraqitur artdashësve një kalendar të pasur aktivitetesh gjatë gjithë muajit gusht. Qyteti do të gjallërohet me ekspozita arti, net folklorike, kinema të hapura, koncerte, festivale muzike elektronike, filma për fëmijë, shfaqje instrumentale, aktivitete tradicionale në fshatra, Festivalin Ndërkombëtar të Filmit me Metrazh të Shkurtër dhe mbylljen festive me “Twinkle Awards 2026”.

Një program që ndërthur kulturën, traditën, artin dhe argëtimin, duke e bërë Gjirokastrën destinacionin ideal për të përjetuar verën mes historisë dhe trashëgimisë së saj unike.