Italia kërkon sanksione nga BE-ja për ministrin izraelit Ben-Gvirin

Italia i ka kërkuar BE-së të sanksionojë ministrin e ekstremit të djathtë të Izraelit, Itamar Ben-Gvir, për postimin e një videoje që tregon aktivistë të ndaluar nga Flotilja Globale Sumud në Gaza. Në video duken aktivistët të gjunjëzuar me duar të lidhura dhe me kokë në tokë.

Ministri i Jashtëm italian Antonio Tajani tha në mediat sociale se kishte kërkuar sanksione kundër Ben-Gvir për aktet e papranueshme të kryera kundër flotiljes, kapjen e aktivistëve në ujërat ndërkombëtare dhe nënshtrimin e tyre ndaj ngacmimit dhe poshtërimit, në shkelje të të drejtave më themelore të njeriut.

Edhe ministri për Evropën dhe Punët e Jashtme, Ferit Hoxha, ka reaguar në platformën “X” lidhur me pamjet e publikuara.

Ai i ka cilësuar këto imazhe si tronditëse dhe të papranueshme, duke theksuar se të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, ligjit ndërkombëtar dhe ligjit humanitar.

Gjithashtu, ministri ka bërë me dije se ka udhëzuar Ambasadën e Shqipërisë në Tel Aviv që të mbetet në kontakt dhe koordinim të ngushtë me autoritetet izraelite, me qëllim që qytetarëve shqiptarë t’u ofrohet ndihma e nevojshme konsullore, sipas rastit dhe në përputhje të plotë me ligjin ndërkombëtar.