Ja kush është polici i Matit që denigronte me SMS kolegët
Një efektiv i identifikuar tashmë pas dy viteve hetime, i çonte mesazhe në celularë kolegëve të tij…kjo do të ishte mëse normale në një marrëdhënie mes kolegësh, nëse përmbajtja e mesazheve nuk do të ishte fyese e denigruese.
Sipas Prokurorisë, Xhavit Bajrami është oficeri që i çonte SMS kolegëve. Rasti i tij shkaktoi furtunë në radhët e uniformave blu pasi dyshohet se ai çonte mesazhe ku denonconte lidhje personale në raportin shef-vartës, por edhe lidhje të uniformave blu me botën e krimit.
Por për organin e akuzës, është faktuar vetëm një rast i “bezdisjeve” me SMS.
Kallëzimin e ka bërë më 12 janar një punonjës policie në Komisariatin e Matit, ku thotë se nga muaji dhjetor i vitit 2014 e në vazhdim shqetësohet vazhdimisht në telefon nga një numër celulari; mesazhe me përmbajtje fyese.
Prokuroria e pati të vështirë të arrinte deri tek polici, pasi numri i telefonit ishte i regjistruar në emër të një personi të dytë, që ja kishte shitur Xhavit Bajramit.
“Janë marrë deklarimet e shtetasit A.B., i cili ka shpjeguar se ai që prej vitit 2011 e deri në vitin 2014 ka regjistruar në emrin e tij shumë numra celulare të kompanive të ndryshme, të cilët me pas i shiste. Për sa i përket numrit XXXXX089, ai ka shpjeguar se këtë numër ai nuk e ka përdorur asnjëherë vetë, por e ka shitur dhe nuk i kujtohet se kujt”, vijojnë sqarimet e Prokurorisë së Rrethit Gjyqësor Mat, raporton Panorama.
Në këtë periudhë verifikimi, polici duket se ka bërë pushim për 8 muaj duke mos pasur asnjë komunikim me kolegun e tij. Por në vjeshtë të 2015-ës ai ka nisur sërish shqetësimet çka ka detyruar kolegun ta kallëzojë sërish.
Numri më vonë është përdorur në aparatet celulare të anëtarëve të familjes. Kjo ka bërë të mundur identifikimin e autorit, shtetasit Xhavit Bajrami, i punësuar pranë Komisariatit të Policisë Mat.
