Java Kulturore Gjermane sjell në Tiranë artin, muzikën dhe traditat gjermane

Muzikë elektronike, art bashkëkohor, ekspozita, tradita dhe gastronomi gjermane do të bëhen pjesë e jetës kulturore të Tiranës gjatë pesë ditëve të Javës Kulturore Gjermane 2026.

Aktivitetet do të zhvillohen nga 2 deri më 6 tetor, duke sjellë një program të larmishëm për publikun shqiptar dhe duke krijuar hapësira për njohjen dhe përjetimin e kulturës gjermane në kryeqytet.

Ministri i Turizmit, Kulturës dhe Sportit Blendi Gonxhja, përmes një postimi në rrjetet sociale, njoftoi zhvillimin e Javës Kulturore Gjermane dhe ftoi publikun të ndjekë programin e aktiviteteve.

“Na ndiqni për të zbuluar programin dhe për t’u bërë pjesë e aktiviteteve!”, shkruan Gonxhja.

Java Kulturore Gjermane do të sjellë në Tiranë një ndërthurje të muzikës, artit bashkëkohor, ekspozitave, traditave dhe shijeve të gastronomisë gjermane, në një program që do të shtrihet përgjatë pesë ditëve.