“Jemi lojtarë profesionistë shahu”, Irani refuzon rihapjen e Hormuzit pa plotësimin e kushteve nga SHBA

Irani nuk do ta rihapë ngushticën e Hormuzit derisa Shtetet e Bashkuara të plotësojnë kushtet e tij, ndërsa Teherani tha të hënën se iranianët kanë treguar se “janë lojtarë profesionistë shahu”.

“Është pala amerikane ajo që duhet të ndalojë dhe të korrigjojë veprimet e saj të paligjshme dhe shkatërruese”, tha të hënën zëdhënësi i Ministrisë së Jashtme iraniane, Esmail Baghaei, duke iu referuar bllokadës amerikane ndaj porteve iraniane.

“Me drita fikur apo ndezur, iranianët treguan se janë lojtarë profesionistë shahu”, shtoi Baghaei, duke iu referuar krahasimit të Presidentit amerikan Donald Trump, i cili i kishte përshkruar negociatat si një “lojë tavoline”.

Trump të dielën sinjalizoi se ishte i gatshëm të lejonte që presioni ekonomik ndaj Iranit të rritej, duke u tërhequr me sa duket nga ideja për sulme të tjera ushtarake, pasi Teherani paraqiti një listë kërkesash për rihapjen e ngushticës së Hormuzit.

Teherani kërkon që Uashingtoni: të heqë bllokadën, të paguajë kompensim për dëmet e shkaktuara nga lufta gjatë muajve të fundit, të heqë sanksionet ekonomike, të çlirojë asetet e ngrira të Iranit.

Mbyllja e ngushticës së Hormuzit, një rrugë ujore strategjike që normalisht transporton rreth një të pestën e furnizimit botëror me naftë, është bërë pasoja më e qëndrueshme e luftës.

Ngërçi ka bërë që çmimet e energjisë të mbeten një çështje kryesore në politikën amerikane përpara zgjedhjeve afatmesme të nëntorit.

Irani po zhvillon bisedime të veçanta me Omanin për kalimin përmes ngushticës, duke përfshirë mundësinë e krijimit të një korridori të përkohshëm për anijet. Megjithatë, Teherani ka deklaruar se çdo rihapje e vërtetë e ngushticës varet nga negociatat me SHBA-në.

Trump më herët kishte thënë se po e trajtonte çështjen me Iranin “pa shumë zhurmë”.

“Ne vetëm po negociojmë pjesërisht me ta. Thjesht po e vëzhgojmë Iranin me inflacionin e tij të madh dhe faktin që nuk kanë para. Do të zgjidhet. Gjithmonë zgjidhet. Është si një lojë shahu”, tha Trump.

Zyrtari iranian Mohammad Bagher Zolghadr të shtunën paraqiti kërkesat e Teheranit, ndër të cilat përfshihen përfundimi i luftës dhe agresionit ndaj Iranit dhe aleatëve të tij në Liban, Palestinë, Jemen dhe Irak.

Ai kërkoi gjithashtu heqjen e kundërbllokadës amerikane ndaj porteve iraniane, përfundimin e sanksioneve, lirimin e aseteve të ngrira iraniane dhe kompensimin për dëmet e shkaktuara gjatë luftës, sipas agjencisë së lajmeve Tasnim.

Baghaei përsëriti të hënën se, “për sa kohë që bllokada detare amerikane vazhdon, kushtet e nevojshme për të thënë se ngushtica e Hormuzit është bërë një rrugë ujore e sigurt nuk do të ekzistojnë.”

Teherani kishte qenë i angazhuar në negociata me Uashingtonin për t’i dhënë fund luftës së nisur nga SHBA-ja dhe Izraeli në fund të shkurtit. Megjithatë, një marrëveshje paraprake dështoi dhe zyrtarët iranianë kanë thënë se tani bisedimet janë të kufizuara në shkëmbimin e mesazheve përmes ndërmjetësve.